(В12) Священное Писание
4
Диаволдан денемяк
1 Озаман Иисус Айоз Духлан чола (пустынейя) гётюрюльдю, ки диаволдан дененмиш олсун. 2 Да кырк гюн хем кырк геджя оруч туттуктан сора аджыкты. 3 Денеиджи Она йаклашып деди: «Еерь Сянь Аллахын Оолуйсан, сымарла бу ташлара екмек олсуннар». 4 Иисус жувап етти: «Йазылы, ани, «Адам йашамээр салт екмеклян, ама хербир сёзлян, ани чыкэр Аллахын аазындан». 5 Сора алды Ону диавол айоз касабайа (Иерусалимя) да койду храмын сачаана, 6 да деди: «Еерь Сян Аллахын Оолусан, атла ашаа, зере йазылы: „Аллах Кенди ангеллериня сымарлайджэк, Сени баксыннар“ хем „Сени куджак аладжэклар, кёстекленмяясин айааннан бир таша дейни“». 7 Иисус деди: «Хеп ёля йазылы: „Денямя Саабии, сенин Аллахыны“». 8 Сора диавол Ону бир пек ююсек байыр юстюня гётюрдю. Гёстерди Она дуннеин хепси падишахлыкларыны хем оннарын метинниини да деди: 9 «Буннары хепсини Сана вереджям, еер, дюшюп, бана баш иилдярсан». 10 Озаман Иисус жувап етти: «Узаклаш Бендян, сатана, зере вар йазылы: „Саабия Сенин Аллахына баш иилт, хем салт Она измет ет“». 11 Озаман диавол Ону бракты. Ангеллярь, гелип, измет етмяя Иисуса башладылар.
Иисус башлээр проповедь етмяя
12 Иисус ачан ишитти, ани Иоаны капана койдулар, гитти Галилейайа. 13 Бракып Назарети, гелди да ерлешти Капернаум касабасында, гёл бойунда, Завулон хем Неффалимин ерлериндя, 14 ки таманнансын, не хаберленмишти пророк Исайадан, ангысы деер: 15 «Завулонун хем Неффалимин ерлери гёл бойунда, Иордан ашыры, миллетлерин Галилейасы, 16 Каранныкта йашайан инсан гёрдю бююк шавк. Ёлюм гёлгесинин * мемлекетиндя йашайаннара шафк дууду». 17 Ондан сора Иисус башлады насаат етмяя хем демяя: «Дёнюн Аллаха гюнахларныздан, зере йаклашты Гёк Падишахлыы».
Иисусун илк ученичлери
18 Ачан Иисус гечярди Галилейа гёлюн бойундан, гёрдю ики кардаш: Симону, ангысына дяярдиляр Петри, хем Андреи, онун кардашыны, ангылары атарды пласайы су ичиня, чюнкю оннар балыкчыйды. 19 Иисус деди оннара: «Гелин Беним ардыма, сизи инсан тутаннары йападжам». 20 Оннар чабук брактылар пласайы да гиттиляр Онун ардына. 21 Гидип орадан таа илери, гёрду башка ики кардаш: Иакову, Зеведеин оолуну, хем Иоаны, онун кардашыны, ангылары кенди бобаларыннан, Зеведейлен, кайык ичиндя пласаларыны тертиплярди. Оннары да чаарды. 22 Оннар чабук брактылар кайыы хем бобаларыны да гиттиляр Онун ардына.
Иисус ичинь хаберь даалэр
23 Иисус гезярди бютюн Галилейада хем ююредярди инсаны синагогаларда, насаат едеряк Гёк Падишахлыы ичин Ии Хабери. Алыштырарды хертюрлю хасталыктан хем дерттян инсаны. 24 Онун ичин хабер даалды бютюн Сирийа ерлериндя. Она гетирярдиляр хепсини, ким зеетленярди хертюрлю хасталыктан, аарыдан, фена духлардан, кара хасталыктан хем паралич хасталыындан. Оннара саалык верярди. 25 Онун ардына гидярди чок инсан Галилейадан, Декаполистян, Иерусалимдян, Иудейадан хем Иорданын ёбюр тарафындан.